Fondi Shqiptar i Zhvillimit shpall pozicionin vakant “Ekspert për Hartimin dhe Zbatimin e Politikave” (Mbyllur)
- PROFILI I FSHZH
Fondi Shqiptar i Zhvillimit (FSHZH) është organizatë zhvillimore që i përgjigjet sfidave dhe partnerëve të saj në funksion të zhvillimit të qëndrueshëm të vendit. E themeluar që në vitin 1993, FSHZH ka një përvojë 29- vjeçare në zhvillimin e infrastrukturës, urbanizimit, turizmit dhe bashkëpunimit ndërkufitar. Fondi Shqiptar i Zhvillimit zbaton projekte/programe të larmishme në fusha të ndryshme me fokus në infrastrukturë rrugore, zhvillim urban, shërbime utilitare, turizëm, bashkëpunim ndërkufitar dhe kryen aktivitetin në Zyrën Qendrore dhe në katër rajone: Tiranë, Korçë, Shkodër e Vlorë.
Reforma e Zhvillimit Rajonal konsiderohet nga Qeveria Shqiptare si një objektiv i rëndësishëm kombëtar. Në këtë kontekst, Programi për Zhvillimin Rajonal në Shqipëri (RDPA), një projekt i Qeverisë Zvicerane dhe Austriake, është duke mbështetur Qeverinë Shqiptare, në disa prej aktiviteteve, për të çuar përpara Reformën për Zhvillimin Rajonal dhe Kohezionin.
RDPA ofron pozicionin e Ekspertit për Hartimin dhe Zbatimin e Politikave, i cili do të punojë me mbështetjen teknike të RDPA-së dhe nën supervizimin e plotë të Fondit Shqiptar të Zhvillimit (FSHZH).
- QËLLIMI I POZICIONIT TË PUNËS
Eksperti për hartimin dhe zbatimin e politikave do të punojë dhe kontribuojë pranë Fondit Shqiptar të Zhvillimit (FSHZH), për përgatitjen, zbatimin dhe vlerësimin e politikave, me fokus atë për zhvillimin rajonal.
Eksperti për hartimin dhe zbatimin e politikave duhet të njohë ciklin e bërjes së politikave, duke filluar nga identifikimi, analizimi, formulimi, vendimmarrja, zbatimi dhe vlerësimi.
- PËRGJEGJËSITË DHE DETYRAT
- Të kontribuojë në procesin e identifikimit, analizimit, formulimit, miratimit, zbatimit dhe vlerësimit të politikave që lidhen me zhvillimin rajonal;
- Të japë kontribut thelbësor në zbatimin dhe vlerësimin e politikës për zhvillimin rajonal;
- Të përgatisë analizën e situatës dhe kontekstit për hartimin e politikave për zhvillimin rajonal shoqëruar me planet përkatëse të punës;
- Të identifikojë aktorët e nevojshëm në proces dhe të koordinojë perfshirjen e tyre në funksion të përgatitjes së politikave;
- Të identifikojë, analizojë dhe propozojë ide për politika e ndërhyrje që kanë ndikim në zhvillim në nivel rajonal;
- Të kontribuojë në proceset e vizionimit dhe konceptimit të zhvillimit të territorit si pjesë e hartimit të dokumenteve strategjike në nivel kombëtar, rajonal, lokal apo sektorial;
- Të kontribuojë në përcaktimin e prioriteteve dhe drejtimeve strategjike të zhvillimit rajonal;
- Të kontribuojë në shkrimin dhe përgatitjen e dokumenteve strategjike të planifikimit dhe programimit;
- Të jetë i gatshëm të kontribuojë në ndjekjen e detyrave të tjera që lidhen me zbatimin e politikave në tërësi.
- PROFILI I KANDIDATIT
Kandidati duhet të ketë diplomë master në shkenca ekonomike, juridike, sociale dhe fusha te ngjashme me to.
Kandidati duhet: të ketë njohuri të legjislacionit në fuqi për fushën e veprimtarisë; të ketë njohuri të dokumenteve strategjike dhe politikave të zhvillimit të vendit; të zotërojë shumë mirë gjuhën angleze (të folur dhe të shkruar); të zotërojë aftësi të mira menaxhimi, koordinimi dhe vlerësimi të veprimtarisë dhe përdorimit të burimeve në dispozicion; të zotërojë aftësi komunikimi në mënyrë efektive, përfshirë aftësinë për të demonstruar, udhëzuar, shpjeguar, bindur, negociuar dhe lehtësuar diskutimet dhe mbledhjet, për grupe të mëdha; të ketë njohuri të mira mbi përdorimin e programeve bazë kompjuterike, duke përfshirë MS Word, Excel dhe PowerPoint.
Të ketë minimalisht 5 vjet eksperiencë pune në hartimin dhe zbatimin e politikave; Eksperiencë në prezantime të ndryshme lidhur me fushën e veprimtarisë; Eksperienca në zhvillimin ekonomik lokal dhe rajonal përbën avantazh.
- APLIKIMI
Të gjithë të interesuarit, janë të lutur që të dërgojnë CV dhe letër interesi nëpërmjet adresës së e-mailit burimenjerezore@albaniandf.org
Afati i fundit për aplikim: 04 mars 2022.
- VLERËSIMI/INTERVISTIMI
Faza I: Aplikimet e mbledhura do të shqyrtohen nga Komisioni i Vlerësimit. Kandidatët që plotësojnë kriteret, do të njoftohen për të zhvilluar një intervistë me përfaqësues të FSHZH dhe RDPA.
Kandidatët që do të përzgjidhen pas intervistës do të njoftohen nga Njësia e Burimeve Njerëzore për takimin pranë zyrave të FSHZH për të vijuar me fazën e dytë.
Faza II: Vlerësim për aftësitë e bashkëpunimit dhe komunikimit për një tematikë të caktuar nga Komisioni i Vlerësimit.
Kandidatët fitues të fazës së dytë do të njoftohen të fillojnë punën duke lidhur kontratën individuale përkatëse.