Në kantierin e rrugës së re “Roskovec – Poshnje”, punëtorët po kryejnë dhe rishikimet e fundit teksa përmbyllin me sukses realizimin e një tjetër aksi rajonal që lehtëson qarkullimin për banorët, fermerët dhe bizneset e Beratit, Roskovecit dhe Fierit.

Përmes financimit nga Banka Botërore dhe zbatimit nga Fondi Shqiptar i Zhvillimit kjo ndërhyrje vjen në kohën e duhur dhe për sezonin turistik duke konsideruar këtu lidhjen e të gjithë qarkut të Beratit me Jugun e Shqipërisë, Fier e Vlorë por edhe daljen më të shpejtë në tregje të produkteve vendase.

Rehabilitimi i infrastrukturës ka një impakt të menjëhershëm në reduktimin e kohës dhe kostove duke ndihmuar mjaft të rinj të zonës ti rikthehen bujqësisë, blegtorisë si dhe gjithashtu agroturizmit, favorizuar këto nga një zonë e pasur dhe peizazh piktoresk.

Njëkohësisht me rëndësi vlen të theksojmë dhe rritjen e sigurisë në qarkullimin rrugor për automjetet dhe këmbësorët, ndihmuar nga zgjerimi i rrugës ekzistuese dhe ndërtimi sipas standardeve më të mira.

Kryetarja e Bashkisë Roskovec znj. Bufi ndër të tjera shprehet:

 

Majlinda Bufi

Bashkia Roskovec
Fondi Shqiptar i Zhvillimit ka vijuar me procesin e zbatimit të këtij projekti, përmes të cilit është kryer trajtimi i rrugës ekzistuese, e cila ishte plotësisht e amortizuar dhe në kushte të rënduara infrastrukturore që vështirësonin qarkullimin e automjeteve. Është zgjeruar aksi në të gjithë gjatësinë e tij dhe janë ndërtuar trotuare ku mungonin në qendrat e banuara, si dhe është ndërhyrë në veprat e artit për zgjerimin e urave sipas standardeve të rrugës.  
Banorët e konsiderojnë investimin mjaft të rëndësishëm për zhvillimin ekonomik e social. Sipas tyre, rikonstruksioni i kësaj rruge i jep zgjidhje infrastrukturës rrugore që prej vitesh ishte kthyer në problem në zhvillimin e jetës dhe ekonomisë lokale nga rënia e qarkullimit të automjeteve për shkak të amortizimit duke u bërë pengesë dhe për aktivitetet tregtare.  

Me një gjatësi investimi rreth 13 km, rruga fillon në Roskovec pranë rezervuarit dhe mbaron në kryqëzimin e kësaj rruge me rrugën Berat-Lushnje në Rrethrrotullimin e Poshnjes. Gjithë ky segment përshkon Roskovec, Strume, Kutalli, Rerez deri në Rrethrrotullimin e Poshnjes.

Fondi Shqiptar i Zhvillimit me një fokus të veçantë kundrejt zhvillimit rajonal përmes këtij investimi nxjerr në pah potencialet e shumta turistike të rajonit të Beratit dhe Fierit, duke zgjeruar ofertën turistike për këto qarqe dhe duke mundësuar një zhvillim të qëndrueshëm ekonomik e social.