Ditën e premte, më 24 Qershor 2011, Kryeministri Berisha mori pjesë në ceremoninë e inaugurimit të përfundimit të punimeve për rikonstruksionin e segmentit rrugor “Rruga Nacionale–Kala Prezë”. Pjesëmarrës në këtë ceremoni ishin gjithashtu edhe Z. Keltis Kruja, Prefekti i Tiranës, Z. Benet Beci, Drejtor Ekzekutiv i Fondit Shqiptar të Zhvillimit, Kryetari i Komunës Prezë, deputë të zonës, si dhe banorë të fshatit Prezë.

Në fjalën e tij përshëndetëse Z. Berisha e vuri theksin mbi potencialet turistike të Shqipërisë: “Shqipëria këtë vit vjen si destinacioni më i bukur, më kryesor turistik. Shqipëria ka potenciale të jashtëzakonshme, ka brigjet më të bukura, ujërat më të shkëlqyera, malet më të virgjëra , por mbi të gjitha ka banorët e saj, me një mikpritje të pashoqe në Europë dhe në Botë. Ndaj dhe le të shpalosim ne të gjithë mikpritjen tonë, të gjitha bukuritë e mëdha natyrore që kemi, pasuritë kulturore dhe do të bëhemi gjithnjë e më të njohur, më të famshëm, më me emër të mirë në Europë dhe në Botë, si destinacioni turistik… ”

Rikonstruksioni i segmenti rrugor që lidh rrugën Nacionale me qendrën e komunës dhe Kalanë Prezë u financua nga Banka Për Zhvillim e Këshillit të Europës dhe Qeveria Shqiptare në vlerën 176 milionë lekë. Rruga e re me gjatësi 3.2 km dhe gjerësi prej 5 metrash është e pajisur më bankina për këmbësorët, barriera mbrojtëse metalike dhe me mur guri, sistem ndriçimi gjatë gjithë gjatësisë së rrugës si dhe me sinjalistikë rrugore horizontale e vertikale.

Përveç impaktit të drejtëpërdrejtë që do të ketë në lehtësimin e kushteve të transportit për 7000 banorët e fshatrave Prezë, Palaq si dhe Ahmetaq, Fushë Prezë dhe Gjec Kodër, ky rikonstruksion do të kontribuojë edhe në zhvillimin e turizmit si pasojë e shtimit të numrit të vizitorëve dhe të bizneseve të vogla. Vizitorët vendas dhe të huaj të interesuar për turizmin kulturor do të mund të vizitojnë në kushte komode Kalanë e Prezës e cila me pozicionin e saj të favorshëm mbi një kodër ofron një pamje panoramike të qytetit të Tiranës. Kjo Kala që është shpallur monument kulture filloi të ndërtohet shekullin e 14-të dhe i përkiste familjes feudale të Topiajve. Në qoshet e saj kalaja ka katër kulla rrethore, ku njëra nga këto, ajo e Sahatit mendohet se është ngritur rreth viteve 1800 - 1850.

Rikonstruksioni i kësaj rruge u zbatua në kuadër të Programit “Përmirësimi i Rrugëve Dytësore dhe Lokale” i bashkëfinancuar nga Banka Botërore dhe donatorë të tjerë në një vlerë prej rreth 400 milion USD. Ky program i cili implementohet nga Fondi Shqiptar i Zhvillimit synon të rrisë përpjekjet konkrete për përmirësimin e infrastrukturës në vend si edhe për rritjen e aksesit ndaj shërbimeve bazë dhe tregjeve, veçanërisht në zonat rurale nëpërmjet rehabilitimit të rreth 1500 km rrugë.